20:29 Դանիա vs. Հայաստան |
 Դանիան սեփական հարկի տակ պարտություն կրեց հայերից 4:0 հաշվով: Մալթայից կրած պարտությունից հետո ոչ-ոք նույնիսկ իր ամենագունավոր երազում չէր պատկերացնել, որ Հայաստանի ազգային հավաքականը կկարողանա մի քանի օր անց Կոպնեհագենում 4:0 հաշվով ջախջախել Դանիայի ուժեղ հավաքականին: ի՞նչպես կարելի է բացատրել այս ֆենոմենը: Ամեն ինչ շատ պարզ է: Այս հաղթանակը ապացուցեց, որ մեր հավաքականի վերջին անհաջողությունների գլխավոր պատճառը թիմի հոգեբանական անկայուն իրավիճակն էր: Դանիայի հետ խաղին դրված էր մեր տղաների հեղինակության և թասիբի հարցը ու նրանք ապացուցեցին, որ կարող են, եթե համախմբված են… Անսովոր էր տեսնել մեր այս հավաքականին նման իրավիճակում: Չէ, որ նախորդ տարի հենց այս նույն տղաները իրենց թիմային անձնազոհ խաղի շնորհիվ ուրախացնում էին ողջ հայ ժողովրդին: Վերջին ժամանակում մեր տղաների աչքերում մարել էր «կրակը», մարզական չարությունը: Մալթայի և Դանիայի հետ խաղերի միջև սարերի և ձորերի տարբերութուն կարելի էր նկատել: Դանիացիների հետ խաղում Հայաստանի հավաքականը գործեց, ինչպես մեկ մարմին, մեկ բռունցք և մեկ թիմ: Եվ մենք կրկին ականտես եղանք այն թիմին, որին սովորել էինք տեսնել: Մալթայի հետ խաղից հետո Վարդան Մինասյանի սաները խաղադաշտ դուրս եկան մարզական չարությամբ և հաղթանակի ձգտման անսահման տենչանքով: Մեր տղաները ցուցադրեցին իդեալականին մոտ ֆուտբոլ: Կարծում եմ Դանիայի հավաքականի հետ խաղը մեր ընտրանու կատարմամբ լավագույն հանդիպումն էր: Նույնիսկ ավելի լավ ֆուտբոլ ցուցադրեցին, քան մեկ տարի առաջ Սլովակիայի հետ կայացած հանդիպման ժամանակ, երբ Ժիլինայում կրկին հաղթեցինք 4:0 հաշվով: Վարդան Մինասյանը փորձում էր մեր թիմի խաղային անկումը քողարկել ֆուտբոլիստների ֆունկցիոնալ պատրաստվածության և մարզավիճակի հետ, սակայն ակնհայտ է, որ նման խաղային խնդիրներ ունեցող թիմը չէր կարող մի քանի օրում շտկել վերոնշյալ խաղային խնդիրները: Ինչ վերաբերվում է թիմում տիրող հոգեբանական իրավիճակին, ապա ակնհայտ է, որ այդ խնդիրները ոչ, թե ներսում են, այլ դրսում, որոնք պարբերաբար խախտում են թիմում տիրող առողջ մթնոլորտը: Դանիայի հետ խաղում հատկապես հաճելիորեն զարմացրեց Յուրա Մովսիսյանը, ով հայտնվելով մեկնարկային կազմում հենց խաղի առաջին րոպեին ապացուցեց իր բարձր կարգը և գերկամային հատկանիշները: Եվ այստեղ հարց է առաջանում. «Ինչո՞ւ Յուրան Մալթայի հետ խաղում խաղադաշտ դուրս չեկավ մեկնարկային րոպեներից»: Կարծում եմ Մովսիսյանը այդ հարցի պատասխանը տվեց Դանիայի հետ կայացած խաղում: Ակնհայտ է, որ Յուրան պահեստայինների նստարանին էր հայտնվել ոչ խաղային խնդիրների պատճառով: Երեկվա խաղում փայլեցին բոլորը և հանդես եկան, որպես մեկ թիմ: Մենք ևս մեկ անգամ համոզվեցինք, որ մենք ունենք մեծ պոտենցիալով ազգային հավաքական, որին պետք է վերաբերվել մեծ հարգանքով: Ինչպես ասում են լավ է ուշ քան երբեք և Հայաստանի հավաքականը վերջապես խախտեց է չորս անընդմեջ խաղերից բաղկացած պարտությունների շարքը: Հավատանք, որ այս հաղթանակը մեր թիմի համար շրջադարձային է լինելու և մենք կրկին Բրազիլիայում հանդես գալու հույս ենք փայփայելու: Արտակ Վահանսարյան ©`shamshyan.com 1-ին գոլ Յուրա Մովսիսյան-27-րդ վայրկյանին 2-րդ գոլ Արաս Օզիլիս- 3-րդ գոլ Յուրա Մովսիսյան 4-րդ գոլ Հենրիխ Մխիթարյան      |
|
|
| Մեկնաբանություններն ընդամենը՝: 0 | |